Miarena ry Firenena Merina

HAVERENO AMIN'NY MERINA
IZAY AN'NY MERINA!

(Lahatsoratra navoakan'ny gazety FEON'NY MERINA : Laharana faha-149, tamin'ny 29 Marsa 1997,
fahatsiarovana manokana ny tolom-pahafahana tamin'ny taona 1947)

Efa ho roa arivo taona izao no nanomboka nitety riaka ireo razamben'ny Merina ka tojo taty Madagasikara. Nitsofoka ary niakatra taty anivotany izy ireo, ary nanorina fiaraha-monina sy fanjakana manana ny maha-izy azy.
Zato taona mahery kosa izao no nandresen'ny mpananimbohitra an'io fanjakana io, ary niezahan'ny Frantsay mpanjanaka, sy ireo niray petsapetsa taminy, handringana ny foko Merina tamin'ny famonoana sy fomba an-kolakahafa isan-karazany. Isaorana anefa Zanahary nitahy ka tsy nahatanterakaan'io teti-dratsy io hatramin'ny farany. Tsy mbola lany tamingana akory isika Merina, na ara-batana izany na ara-kolotsaina, na dia efa niaran'ny faharavana be tokoa aza.
Efa ho roa arivo taona koa izao no nisy nilaza hoe "Avereno amin'ny Kaisara izay an'i Kaisara, ary ho an'Andriamanitra izay an'Andriamanitra". Isika kosa ankehitriny dia hanandratra hoe "Avereno amin'ny Merina izay an'ny Merina!".
Tsy miafina eo anatrehan'izao tontolo izao fa MISY ny fahasamihafana eo amin'ny mponin'i Madagasikara. Fotokevitra toavina eran-tany ankehitrinyny fanajana ny fisian'ny foko isan-karazany dia fototra iorenan'ny kolotsaina maha-olombelona. Manara-maso antsika izao tontolo izao ary MIADY MANANA NY RARINY isika Merina raha mitaky fa ny fahaleovantena no hany FAMERENAN-KASINA ny fokontsika. Miantomboka amin'ny fahaleovantenantsika no hanorenantsika firaisam-pirenena vaovao sy mari-potitra eto Madagasikara.
Ny ZAIKABE MERINA, izay natomboka amin'ny alalan'ny tambatserasera, dia natao mba hitantana ny tolontsika am-pilaminana sy am-pahamendrehana.
Tsy maintsy tafarina ny Firenena Merina!
Ny Fanahy no Olona

Henoy indray ity Antson'ny Zaikabe Merina ity.
Miarena ry Firenena Merina!

Amin'izao fitsingerenan'ny faha-50 taonan'ny raharaha 29 Marsa 1947 dia ity antso ity no entinay hanomezam-boninahitra ireo REHETRA namoy ny ainy ho fanafahana an'i Madagasikara: MIARENA RY FIRENENA MERINA!
Fa ahoana izany hoy ianao? Fa angaha ny Merina ihany no namoy ny ainy nitolona ho an'ny fahaleovatenan'i Madagasikara?
Marina izany, kanefa misy ireto fanamarihana telo ireto tianay ambara.
Voalohany dia ny nanararaotan'ny Frantsay mpanjanaka an'iny tolona iny hirosoana lalindalina kokoa tamin'ny VONO-TARANAKA (genocide) nampiariny tamin'ny Merina. Tetika efa natombony ny fandringanana ny Hova raha vao nahababo ny Fanjakan'i Madagasikara ry zareo, ary mbola mitohy hatramin'izao fotoana izao, amin'ny endriny samihafa, ny fampietrena ny maha-foko ny Merina.
Faharoa, ny fahaleovantena nomena an'i Madagasikara, tamin'ny taona 1960, dia fahaleovantena saritsariny, nomena hotantanan'ireo tsy niady an'izany akory sy ireo "Malagasy" mankasitraka ny fampietrena ny Merina. Noho izany tsy misy fahaleovantena ho an'ny Merina ao anatin'ny fahaleovantenan'i Madagasikara hatramin'izay ka hatramin'izao.
Fahatelo, Madagasikara TOKANA, Malagasy IRAY. Ireo no foto-kevitra nijoroan'ny tia tanindrazana rehetra hatramin'izay. Hita anefa ankehitriny fa zava-boajanahary tsy azo hidovirana ny fisian'ny FAHASAMIHAFANA eo amin'ny mponina sy tontolo iainan'i Madagasikara. Miha-mazava hatrany fa ny fanoherana an'io fahasamihafana voajanahary io no anisan'ny mampikoroso antsika. Tsy natao handrava fihavanana ny fananganana Firenena Merina fa hanamafisana ny fanajana ny fahasamihafana!
Noho izany, ny fanomezam-boninahitra atolotray ho an'ireo rehetra nilahatra sy nifarimbona tamin'ny Merina mba hanoherana ny mpananimbohitra, dia io fanajana ny fahasamihafana io, ary ny fianianana mialoha fa tsy hikendry fananjahana ny hafa mihitsy izahay rehefa tafarina ny Firenena Merina amin'ny endriny vaovao!
Jonah Andrianarivo

Sehatr'Imerina Ny eritreritrao...